Peranak Indonesia Positif Covid-19 Lari Ari PKRC Udah Ditangkap

KUCHING 12 Ogos; Dua iku lelaki peranak Indonesia positif Covid-19 ti ngelarika diri ari Palan Kuarantin Enggau Perubat Covid-19 (PKRC) di Sri Aman udah mujur ditangkap polis.
Tuai polis pelilih Sri Aman, Dsp Bingkok John madah, dua saspek nya beumur 18 taun enggau 19 taun pesakit Covid-19 lari ari PKRC nya mujur ditemu urung pukul 11.10 pagi.
Dalam siti penerang, ku iya madah, urung pukul 11.10 pagi raban polis bejalaika pengawa matau ‘Op Kesan’ di Kampung Stumbin, Kilometer 18, Jalai Sri Aman-Lingga , lalu tetemuka dua lelaki nya enggau siku lelaki peranak menua tu ke beumur 15 taun ari Kampung Pangkat Stumbin, Sri Aman.
Kedua-dua saspek diserah ngagai raban Opis Menteri Pengerai Malaysia (KKM) ngambi ulih bejalaika atur ke patut.
Siku nembiak ke betemu enggau kedua-dua saspek nya diatu udah diengkah ba palan kuarantin.
Ku iya madah, kes nya agi ditasat.
Kes ditasat ba baruh Seksyen 269 Kanun Keseksaan enggau Seksyen 22 (b) Akta Nagang enggau Nyeliah Penyakit Berampit 1988