KUCHING, 7 Ogos: Projek Waterfront Simanggang udah manggai 85 peratus tembu digaga.
Projek tu dibagi ngagai tiga seksyen iya nya ‘Wharf Section’, ‘Board Walk Section’ enggau Culture & Herritage Centre.
Menteri Muda Pengelantang Komuniti, Datuk Francis Harden Hollis Madah, penembu projek nya deka ngangkatka agi pemansang ba sitak Simanggang seraya nyungkak penatai pemisi rayat.
Kelimpah ari nya, ulih mantu ba pemansang aktiviti dagang sereta produk dagang temuai peranak Simanggang.
“Ba sekyen ‘Wharf Section’ taja bedau rasmi endur nya diatu udah dibuka ngagai mensia mayuh meda kediri pemanah rampa palan digaga ti ngena motif produk menua tu enggau replika Bujang Senang” ku iya madah maya bejalai matau pemansang Projek Waterfront Simanggang kena Hari Lima tu tadi.
Harden ke mega Kaban Kunsil Nengeri (ADUN) Simanggang madah, pengawa nyemin endur entara tokong ciyun bagi seksyen ‘Board Walk’ mega udah tembu digaga.
Semina kereja nyanggit atap ba seksyen Culture And Herritage Centre benung chakah dipejalaika seraya deka didirika replika ‘Ikan Bulu’ ti nyadi produk sungai Batang Lupar.
Berebak enggau nya, iya ngelalau rayat di Simanggang bela besaup nyaga pemanah tebing sungai Batang Lupar enggau seruran nyaga pemeresi endur nya.
