KUCHING, 7 Ogos – Siku agi anak Sarawak mujur bepekit ba tikas entarabansa.
Maxwell Mark Layang mujur diangkat nyadi Mr Glam International 2021 ke diatur nguna chara virtual tauka dalam tali arus apin lama ke udah.
Taja pan napi mayuh pemar lebuh dalam pekit nya, iya tetap meransang diri enda mudah putus pengarap sereta pechaya iya bisi ngembuan pengelebih ti ngemujurka pejalai iya dalam pekit nya.
Maxwell ke asal ari Sibu bepekit ngelaban 31 iku pesereta bukai ari serata menua sebedau iya mujur diangkat nyadi pemenang.
Pekara ti dikemeratka ke iya lebuh ba dalam pekit iya nya mandangka pemanah rampa menua Malaysia tebal agi ari sukut eko dagang temuai sereta disanding pengelandik iya ngayanka main asal.
“Pekara ti dikemeranka aku lebuh nyadi pengari menua kitai Malaysia ba dalam pekit tu iya nya aku mandangka pemanah rampa menua Malaysia baka eko dagang temuai.
“Aku mega mantaika pengelandik aku empu lalu ulih nyadika chunto tauka teladan ngagai bansa kitai Iban, lebih agi nembiak rebak baru.” ku iya madah ngagai pengarang berita TVS apin lama ke udah.
Sebedau tu, pekit Mr Glam International 2021 nya diatur sepengelama enam hari ba pun ari 25 hari bulan 7 nyentuk ke 30 hari bulan 7 tu tadi.
Tuai rumah ke ngatur pekit tu iya nya menua Filipina lalu taun tu edisyen kedua pekit nya diatur ti dipasuk pengari lelaki ari serata menua.
Ku Maxwell madah, ketegal dunya agi napi pengekai igi penyakit COVID-19 mayuh pengawa enda ulih dipejalaika baka ngerikod video tauka ngambi gambar ke diguna ba dalam pekit nya.
Tang, iya benasip manah laban kala ngambi video enggau gambar ba pekit bukai sebedau tu ba malaysia ke ulih dipandangka iya baru.
Bisi sekeda video enggau gambar diambi iya ba dalam rumah tauka studio aja nyengkaum nyaut tanya ke diberi pengatur pekit Mr Glam International 2021.
“Aku meri jaku peransang ngagai raban nembiak baru ke rindu ngagai pengawa baka aku tu tauka bidang bukai anang mudah putus pengarap lalu tetiap juluk ke dikeingin ati mesti deka dijapai seraya ulih nyadi nyata,” ku iya madah agi.
Kelimpah ari nya, dalam pekit nya maxwell mujur nerima gelar bukai ti ngujungka iya entara pesereta ke narit ati raban akim.
Ngagai raban nembiak rebak baru, teruska pengerindu kita ba sesiti bidang, anang mudah putus pengarap, anang alah laban penguji.
Sekalika ba pengawa sekula, kereja, bedagang, belagu sereta ke bukai sereta anang mantul ngapa seagi enda tepantup ba bandir tauka datai ba adan.
