Projek Jalai Ke Nanga Sepaya Udah Tembu

KUCHING, 5 OGOS: Juluk ati peranak rumah panjai Nanga Sepaya Ulu Engkari Di Lubok Antu deka bisi jalai alun udah nyadi nyata.
Penembu projek ngemanahka tikas jalai alun ngagai rumah David Ujan, Nanga Sepaya nya ti penyauh 1.5 kilometer ngemudahka peranak ari menua ulu ke pasar ti nadai begunaka perau agi nengah tasik Hidro Batang Ai, Lubok Antu.
Menteri Muda Pemansang Industri Sarawak, Datuk Malcolm Mussen Lamoh madahka, projek ti begunaka ungkus RM$60,000 nengah Duit Turu Kaunsil Ejensi Konsesi Kampung (LKWKKH) 2020 meri pemaik ngagai 579 iku peranak ti ngaul 60 pintu rumah Nanga Sepaya.
Berebak enggau nya, iya ke mega Kaban Kunsil Nengeri (ADUN) Batang Ai udah matau kediri projek jalai nya ngena helikopter, empai lama.
Ngarika semua peranak di rumah panjai Nanga Sepaya, Kunsilor David Ujan madahka lantang ati sereta beterima kasih enggau perintah ti udah nembuka projek nya.
“ Berasai nyamai lebuh mindah ke pasar pengudah bisi jalai enti dibanding enggau suba semina ngena perau nengah ai tasik hidro lebih agi enti maya malam. Tambah mega jalai tu udah ngurangka ungkus belanja bebelika minyak.”ku iya lebuh ditelefon pengarang berita sehari tu.
Ke penerang, projek jalai tu udah berengkah digaga kena 30 November 2020 enggau tembu kena 30 Jun 2021.
Ba awak ke sama, Projek Bekal Ai Alternatif Sarawak (SAWAS) ti beungkus RM4.5 juta di Nanga Sepaya diatu udah manggai 50 peratus tembu.