KUCHING : Yang di-Pertuan Agong Al-Sultan Abdullah Ri’Ayatuddin Al-Mustafa Billah Shah udah ngenukuka Proklamasi Darurat di Sarawak dilanjar ari berengkah ari 2 Ogos ngagai 2 Februari 2022.
Kelimpah ari nya, proklamasi tu nangguhka dulu Pengawa Bepilih Nengeri (PRN) laban ia enda tau diatur dalam timpuh darurat nya.
Nitihka penerang nya, Agong ke nyadi tuai pemegai menua, nyukung proklamasi darurat nya laban pengekai igi penyakit COVID-19 tau ngeruga pengelikun mensia mayuh sereta pengelantang menua.
Bemalinka Fasal (3) Pekara 21 Perlembagaan Nengeri Sarawak, Kunsil Nengeri (DUN) ambis timpuh kena 7 Jun ti udah, tang fasal nya nadai kuasa baka ti dipadah ba genteran 15 (1) (a) Ordinan Darurat (Kuasa-Kuasa Perlu) 2021, ti ngantung pengawa bepilih.
Nitihka penerang perintah besai, ordinan nya nadai agi kena 2 Ogos bepelasarka Proklamasi Darurat ti dipansutka kena 11 Januari suba.
Sebedau tu, PRN Sarawak mesti diatur dalam timpuh 60 hari belabuh ari 2 Ogos nitihka Fasal (4) Pekara 21 Perlembagaan Nengeri Sarawak.
“Fasal (1) Pekara 150 Perlembagaan Persekutuan ngungkupka dalam penyadi ti baka nya, aku ulih mansutka Proklamasi Darurat iya nya ngantung pengawa bepilih dikena nagang pengekai igi penyakit COVID-19,” ku Agong dalam gazet Perintah Besai.
Penerang Perintah Besai ti dipansutka Istana Abdulaziz di Indera Mahkota, Kuantan, Pahang mega madahka pekara tu deka dipejurai ba Parlimen nitihka Fasal (3) Pekara 150 Perlembagaan Persekutuan.
