SONG, 31 Julai – Bisi 136 iku nerima Kenyalang Gold Card (KGC) di pelilih Song maya hari lima.
Program nyerahka KGC nya dipenyadika Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit Datuk Seri Fatimah Abdullah.
Nitihka ripot UKAS, ba dalam program nya, Fatimah madahka pengelebih ke diberi ngagai orang ke bisi megai KGC iya nya bisi diskaun tauka yuran pechuma ba sekeda premis pengerai, perengka pengangkut mensia mayuh sereta kedai runchit.
Beduduk ari nya, Kaban Kunsil Nengeri (ADUN) Katibas, Datuk Seri Ambrose Blikau ngarapka, penerima KGC bulih penguntung lebuh ngembuan kad nya.
“Aku ngarapka tetiap iku penerima KGC nguna kad tu manah-manah lalu enti sema bisi tanya senentang KGC, ulih nanya tauka betelefon ngagai Opis Pengintu Pengelantang Raban Bansa,” ku iya madah.
Kelimpah ari nya, bantu ihsan pemati mega diserahka ngagai lima iku pewaris sereta sama nerima RM3,000 siku.
Fatimah lebuh bejadika Palan Aktivti Orang Ke Tuai Umur (PAWE) Pelilih Song madahka, palan nya ditumbuhka dikena ngemudahka raban tuai umur di pelilih nya bejalaika aktiviti rama.
“Tuju penumbuh palan tu mega dikena nyaga pengelantang seraya narak chara idup bepengerai ungkup orang ke tuai umur,” ku iya madah agi.
Fatimah mega nyerahka chek RM50,000 ngagai PAWE Pelilih Song enggau geran RM10,000 ngagai PAWE nya sereta Palan Mulaika Pemanah Ulah Dalam Komuniti (PPDK) Song.
