KHAMIS: Yang Di-Pertuan Agong, Al-Sultan Abdullah Ri’Ayatuddin Al-Mustafa Billah Shah madahka diri asa ati enggau penerang ti digaga ba Parlimen maya Hari Satu 26 Julai, iya nya perintah udah nginsil semua ordinan darurat ti udah dipadahka Agong sepemanjai timpuh darurat.
Kebuah pia laban pemutus nya ti bendar bedau dikemendarka Agong.
Datuk Pengelola Bijaya Diraja Istana Negara Datuk Ahmad Fadil Shamsuddin madahka Agong mega madahka diri asa ati ketegal pekara ti dikemendar iya enggau menteri ba Opis Menteri Besai, Datuk Seri Takiyuddin Hassan, sereta Luyar Menua Tan Sri Idrus Harun, iya nya langgur deka nginsil semua Ordinan Darurat deka dipejurai sereta diperundingka dulu ba Parlimen, enda dipejalaika sida.
Agong nyemetak madah, penerang menteri ba parlimen kena 26 Julai suba nya enda engkeman sereta ulih meri penyaru ngagai kaban Dewan Rayat.
Nangkanka nya, Agong madahka peminta nginsil semua Ordinan Darurat berengkah Hari Satu dipejalaika enggau beguai sereta nadai dipejuraika ba Parlimen.
“Seri Paduka Baginda nyemetak madah penerang Yang Berhormat Menteri ba Parlimen maya 26 Julai enda betul sereta ulih meri penyaru ngagai Kaban Dewan Rayat,” ku Datuk Pengelola Bijaya Diraja Istana Negara Datuk Ahmad Fadil Shamsuddin madah dalam siti penerang
Berindik ari nya, Agong madahka penerang ti dipansut nya ukai semina ulih mai penyaru ba Parlimen, tang mega enda bebasaka prinsip kedaulatan undang-undang baka ke bisi dalam Rukun Negara.
Kelimpah ari nya, pekara tu mega melakangka kuasa Agong ti nyadi tuai pemegai menua baka ke dipadahka dalam Perlembagaan Persekutuan.
