KUCHING: Mayuh spekulasi enggau mayuh jaku sangka udah dipansut pasal kemaya Pengawa Bepilih Nengeri Ke-12 (PRN12) deka nyadi ba Sarawak.
Taja pia, PRN12 deka bepanggai ba pemutus Opis Menteri Pengerai (KKM) enggau Opis Pengawa Bepilih (SPR).
Penerang tu dipansutka Kepala Menteri Sarawak, Datuk Patinggi Abang Johari Tun Openg, lebuh aum pengarang berita sepengudah iya bejadika pengawa muka Dewan Dagang enggau Industri Orang Ulu. ba sebengkah hotel ditu.
Nengeri tu lebih ngemeratka agi pengerai enggau pengelikun rayat ari dikeruga penyakit COVID-19.
“Kitai nganti aja nama utai ti nyadi dalam kandang seminggu dua tu, tang utai ti nyengala, pekara ti patut diperunding ia nya gaya kes COVID-19 diatu,” ku Abang Johari.
Iya mega nerang, Darurat diatu agi bejalai lalu deka tembu kena 1 Ogos ti deka datai.
“Bisi tiga pekara ti benung diperunding. Entara ia, baka gaya kes COVID-19 ti nyadi. Kati kes kitai majak manah tauka enda? Kedua, kati SPR udah netapka atur operasi standard (SOP) kena bejalaika pengawa bepilih tauka bedau? Tu ti patut diputuska SPR dulu.
“Lalu ketiga, perintah GPS amat ngemeratka pengerai rayat Sarawak. Kitai enggai utai ti nyadi lebuh pengawa bepilih di Sabah nyadi ditu,” ku Abang Johari.
Perintah Gabungan Parti Sarawak (GPS), tambah iya, begunaka mandat baru kena mai Sarawak nyingkang ke mua.
Pengudah Darurat tembu kena 1 Ogos, Sarawak bisi timpuh 60 hari udah nya endur iya ulih ngatur pengawa bepilih.
“Kediatu, DUN kitai agi baka selama lalu agi kena Darurat. Kitai deka meda nama utai ti nyadi pengudah 1 Ogos. Taja pia, kitai mesti mega nentuka gaya COVID-19 diatu beinsur manah, Kelimpah ari nya, SOP ti ditetapka mega amat beguna,” ku Abang Johari.
“Kitai sama bela nganti laban kuasa diatu agi dipegai Yang di-Pertuan Agong.”
Sekalika PRN12 di Sarawak deka diatur tauka enda sepengudah tembu timpuh Darurat mega deka ditentuka ulih pemendar ari Yang di-Dipertuan Agong, Sultan Abdullah Ri’ayatuddin Al-Mustafa Billah Shah.
Timpuh lima taun DUN Sarawak tembu kena 6 Jun 2021, lalu pengawa bepilih nengeri mesti diatur dalam kandang 60 hari.
Taja pia, ia digantung ketegal Darurat ti diatur perintah menua besai.
Perintah nengeri Sarawak mega dilalau ulih Yang di-Dipertuan Agong ngambika terus merintah baka selama maya timpuh Darurat.
