KUCHING, 25 Julai : Ukai siti pengawa ke mudah bejalaika Program Outreach betuchuk vaksin lebih agi ba menua ulu ti semina ulih bekenaka perengka pengangkut sungai.
Tang ketegal deka nentuka nadai siku pan tinggal ari nerima vaksin, raban pengereja pengawa pengerai Klinik Nanga Delok tetap ransing taja napi mayuh pemar ngemujurka proses betuchuk vaksin di Lubok Antu.
Penulung Pegawai Perubat Klinik Delok, Alvin Luger madahka, semua peranak ari tujuh buah rumah panjai ba baruh pegai klinik pengerai Nanga Delok udah nembuka dua dos vaksin nyengkaum sida ke tinggal dos keterubah.
“Naka ke diatu, semua udah nerima dos kedua lalu bisi sekeda ke baru aja nerima dos keterubah ba ditu,” ku iya.
Tu nyengkaum pengereja pengawa Sarawak Forestry Corporation (SFC) enggau pengereja sekula SK Nanga Delok ke tinggal nerima tuchuk vaksin sebedau tu.
Ku iya nerang, dalam pejalai mega, perau bisi pechah mimit ba luan ngelanggar kayu anyut enggau ngelantak batu laban ai langkang.
“Maya kami bejalaika proses betuchuk vaksin tu kami nyuwa perau laban nadai perau dikena ke rumah panjai di ulu tambah mega ai langkang kerangan nyau pansut sereta ai deras.
“Ukai semina nya aja, nadai bungkur internet enggau telefon meri penanggul ngagai kami rejister vaksin dalam sistem mysejahtera enggau ngemataka pesakit ke udah betuchuk nyema sida bisi nama-nama ti begunaka perubat lengkas ke sepital,” ku iya.
Ku iya madah, taja mayuh napi penanggul sepemanjai bejalaika tuchuk vaksin ngagai siti-siti rumah panjai tang kerejasama sereta sambut ti manah ari peranak mayuh mantu ba pemujur proses tuchuk vaksin dikena nyapai imuniti kelompok.
