SPAOH: Peranak ke diau ba rumah panjai tauka menua pesisir dilalau meruan nitihka atur pengawa standard (SOP) kena nyeliah COVID-19.
Sapit Kepala Menteri Sarawak Datuk Amar Douglas Uggah Embas mantaika jaku nya lebuh iya betemu enggau peranak rumah panjai ari Melabu Bair ba Ulu Layar enggau Rumah Jawat ba Babu Tengah, Debak, dalam kandang Kunsil Nengeri (DUN) Bukit Saban kemari.
“Kitai apin likun. Kes positif agi nyadi, lalu tu nandaka igi penyakit nya agi bisi enggau kitai, taja pan ia dipeda baka udah nurun,” ku Uggah.
“Kitai mesti meruan bejaga-jaga. Tu nyengkaum bejaga-jaga ari orang ke datai nemuai tang enda nitihka SOP baka enda ngena sengkabung mua enggau penyalah bukai,” tambah iya.
Uggah, ke mega Chairman Komiti Mutarka Penusah Ngenyit Menua Sarawak (SDMC), mega madah, temuai mega mesti bebasaka atur kena ngelindung mensia mayuh enggau menua pesisir.
“Atur baka ngena sengkabung mua, nyaga penyauh ari pangan diri enggau atur bukai endang digaga ngambika dititih enggau terit,” ku iya.
Ba Melabu Tengah, iya madahka perintah bisi meri geran RM100,000 kena ngaga jematan gantung besi ti deka nganti jematan ti rusak dalam ampuh ti nyadi empai lama ti udah ba endur nya.
Ba Rumah Jawat, Uggah meresa pemansang pengawa ngerataka endur projek ngemesaika rumah panjai nya, begulai enggau Kaban Parlimen Betong Datuk Robert Lawson Chuat sereta sekretari politik Kepala Menteri Dr Richard Rapu.
Udah nya sida nemuai ngagai SK Nanga Gayau lalu ngabas pengawa ngemanahka agi sekula nya ti beungkus RM7 juta.
Tu nyengkaum ngaga blok begunan tiga tingkat ti bisi enam bilik kelas, makmal sains, opis pengajar, palan pengatur pengawa, empat unit kuarters pengajar enggau perengka guna bukai.
Pengawa nya dijangka tembu ba bulan Januari taun ti deka datai.
