KUCHING: Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit, Datuk Seri Fatimah Abdullah, madah 200,842 bakul pemakai udah mujur disadung ngagai 1,439 endur ti bejalaika Perintah Nagang Pemindah Terit (PKPD) ba selampur menua Sarawak.
Lebih RM17.4 juta dibelanja ungkup pengawa nya ari pun bulan Januari 2021 ngagai 18 Julai, enggau bakul pemakai ti disadung ngagai 197,997 iku ketuai ruang bilik.
Fatimah mega madah, inisiatif bakul pemakai tu enda deka diketu seagi bisi endur ti diletak bejalaika PKPD.
“Perintah Sarawak udah mutuska tiap iti endur ti disekat pemindah patut dibekal enggau pemakai baka beras, gula sereta ti bukai ngelama dua minggu. Enti sema PKPD disambung tauka dilanjar, opis pengintu pengelantang deka mekal baru pemakai dalam timpuh nya,” ku Fatimah.
Opis Bomba enggau Penyelamat Nengeri Sarawak udah nyadi kaban strategik ti mantu Opis Pengintu Pengelantang Raban Bansa dalam pengawa ngangkut sereta nyadung bakul pemakai.
