Pedagang kedai makai tauka pedagang ke bukai ti bedau nerima tuchuk vaksin COVID-19 diperansang ngerijista diri di Opis Kaunsil Mengeri Miri (MBM).
Tuju nya ngambika nadai siku ari rayat di menua tu sekalika di mengeri tauka sektor ke bukai tinggal ari nerima tuchuk vaksin COVID-19.
Menteri ti megai tanggungpengawa Komiti Mutarka Penusah Ngenyit Bagi Menua Miri (JPBB), Datuk Lee Kim Shin madah, bepelasarka pansik ba palan endur gawa, bisi staf ti muka tauka enda ngena sengkabung mua, makai sereta ngirup begulai maya jam ngetu enda lama.
Iya dipadahka, nyau deka semua pedagang endru nya udah nerima vaksin dos keterubah enggau 50 peratus udah nerima kedua-dua dos vaksin.
Ku iya nambah agi, penyampau 93 peratus pedagang enggau pekereja di kedai makai udah betuchuk vaksin dos kedua.
Iya nyemetak madah, raban penerit adat ari m-b-m deka bejalaika peresa ngenyit ngagai endur ke bukai ngambika nadai siku tinggal ari nerima tuchuk vaksin enggau majak chakah dalam pengawa nentuka tikas pengasi peranak menua tu nitihka atur pengawa standard (SOP).
Kelimpah ari nya, MBM mega bisi nulung raban ke bedau ngerijista diri betuchuk vaksin nengah chara manual.
