Raban jaum jegau di nengeri tu deka diberi vaksin COVID-19 berengkah 8 Ogos tu ila.
Tuju tu dikena nentuka proses betuchuk vaksin raban jaum jegau bejalai enggau lanchar.
 Menteri Pengintu Pengelantang Komuniti, Orang Indu, Ruang Bilik Enggau Pemansang Anak Mit (KWKPK) Sarawak, Datuk Seri Fatimah Abdullah madahka, operasyen besepadu dipejalai dikena nyidi sereta ngulihka data raban jaum jegau.
Operasyen besepadu nya ngaul Opis Residen, Opis Pengerai Bagi Menua, Opis Pengintu Pengelantang Pendiau Bagi Menua, Polis Diraja Malaysia (PDRM), Opis Imigresyen sereta Opis Bekuasa Kandang Menua (PBT) nya dipejalaika dikena nentuka nadai raban jaum jegau tinggal betuchuk vaksin.Â
Nangkanka nya, Fatimah madahka, vaksin dos tunggal nyadi pilih ke pemadu engkeman  ngagai raban jaum jegau nya laban sida enda entap pendiau ba siti  endur aja.
Â
Kelimpah ari nya. Fatimah madahka pengawa tu dikena nyeliahka nama sida ari tinggal nerima dos kedua enggau tuchuk vaksin dos tunggal tu iya nya endang engkeman ngagai sida.
 Iya madahka, maya diatu bisi 221 iku raban jaum jegau udah disidi di sekeda mengeri besai di nengeri tu.
Ari penyampau nya, Kuching ngerikodka penyampau ke pemadu tinggi iya nya 92 iku orang, ditangkanka Miri (66), Sibu (21), Bintulu (21), Sarikei (5) Kapit (6) Enggau Sri Aman (1).
