KUCHINGi: Raban bumai bekebun entara ke balat tekeruga ba penatai pemisi, ke lebih agi sida ke nyual asil utai tanam, ketegal pandemik COVID-19.
Berebak enggau nya, serikat DS Lepi Enterprise ti bepalan ba Rumah Morris, Km 6.2 Jalai Shin Yang di Pakan, ngambi inisiatif nyendiaka palan bedaja ungkup guna bala pedaja ke besemak endur nya.
Pengempu serikat nya, Dolphina Sia ke ngembuan penyiru, ngambi singkang nyendiaka palan endur bejual ungkup raban pedaja ngambika sida mengkang ulih nyual utai tanam baka selama.
“Naka ke diatu, bisi enam iku udah nyual sayur, kuih enggau ti bukai kenyau ari minggu nyin kemari, lalu ngarapka sida mujur sereta ulih ditampung orang bukai bedaja ditu,” ku iya.
Naka ke diatu, pengawa nya nerima sambut ti manah ari peranak genturung pendiau ke bedagangka asil utai tanam sida.
Ku iya madah, peluang nya mega ulih dikena mantu ngangkatka tikas ekonomi raban pedaja ba genturung pendiau nya ke balat bendar kusut penatai pemisi sekumbang pengekai igi penyakit berampit COVID-19.
