KUCHING: Penusah tanah tusur ba Jalai Kota Sentosa-Bau, enda jauh ari lampu traffik Jalai Haji Baki, ditu udah nabanka nyawa siku lelaki tuai.
Nitihka ripot, van ti dibai lelaki nya tepawah lalu labuh ke dalam lebak ngujungka lelaki nya tepekul dalam van ngelama sejam.
Pengudah ripot diterima pukul 12.39 tengah malam, siti tim raban Balai Bomba enggau Penyelamat Batu Lintang dikangau ngagai endur penusah nyadi.
Pendiau tanah ti enda manah ngenusahka agi pengawa nyelamat lelaki tuai nya.
“Kami mujur mansutka lelaki nya lebih kurang sejam udah nya. Pendiau tanah ti agi tusur ngenusahka kereja raban penyelamat, taja pia, bala kami mujur datai ngagai kerita lelaki tadi lalu mansut iya enggau perengka khas ti dikena kami mutung pintu,” ku Sapit Kanan Penguasa Bomba Pusat Gerakan Operasi Sarawak, Mohamad Asnan Led.
Lelaki ke beumur 63 taun nya mujur dipansutka raban bomba urung pukul 1:59 pagi tang ditukuka udah parai ulih raban Opis Pengerai ba endur penusah nya.
Ketuai Balai Polis Kota Sentosa, ASP Mohd Roslan Mat Salleh, ngelalau orang ke ngena jalai alun nya ngambika ngena jalai bukai laban pendiau jalai nya agi bedau selamat.
“Enti jalai tu tutup, kami ngelalau mensia mayuh ngena jalai bukai. Kami deka madah ngagai opis bekuasa ngambika muka jalai bukai laban jalai tu deka ditutup. Agi bahaya ngagai orang ke ngena jalai ditu,” ku ASP Roslan.
Pia mega, Kaban Council Nengeri (ADUN) Kitang, ke mega Chairman Majlis Perbandaran Padawan, Lo Khere Chiang, minta ngambika opis ti bekuasa lengkas nasat kebuah penusah tanah tusur nya nyadi.
“Opis JKR, Lembaga Ai sereta Opis Bekal Ai Menua Pesisir (JBALB) mesti datai kitu lalu nasat kebuah tanah tu tusur. Ba runding aku, tanah tusur tu engka bisi kaul enggau penyambung paip ai,” ku Lo.
Bangkai lelaki Cina nya udah diserah ngagai polis ngambika bejalai pengawa ti patut, lalu pengawa nyelamat diketuka urung pukul 2.28 pagi.
