KUCHING, Julai 17: Dua agi premis palan operasyen judi nengah tali arus udah diperesa ngenyit raban polis.
Tu entara lapan kes operasyen judi nengah tali arus ti mujur dipuntanka dalam timpuh sebulan di pelilih tu.
Ku Tuai Polis Pelilih Kuching Acp Ahsmon Bajah madahka, dua premis nya diperesa ngenyit ba sebuah kondominium di Jalan Lapangan Terbang Kuching lebuh Operasyen Op Dadu khas dipejalaika.
Ku iya bisi 11 iku orang nyengkaum lima peranak menua luar dipelabaka nyadi operator ba premis nya udah ditangkap ngambika ditasat.
“Ba pengawa meresa ngenyit tu, dua premis udah diperesa. Keterubah kami mujur nangkap enam iku iya nya semua peranak menua tu ti berumur 19 nyentuk ke 25 lalu ngerampas mayuh bengkah perengkah komputer ti dikena sida bejalaika operasyen judi nya ti nadai pemendar,” ku iya madah.
“Ba operasyen meresa ngenyit kedua, udah mujur nangkap lima iku iya ke mega peranak menua Indonesia. Ba pengawa meresa ngenyit tu mega kami mujur ngerampas mayuh bengkah komputer dikena sida bejalaika operasyen nya.”
Ku iya nambah, kenyau ari tujuh bulan ke udah, premis judi nya mujur bulih untung sepenyampau RM1.68 juta ringgit iya nya kira-kira RM8,000 sehari.
Nangkanka nya, pengawa meresa ngenyit kedua ba kondominium ke sama tetemuka premis nya udah bejalaika pengawa judi online berengkah tiga bulan ke udah ti mujur bulih untung manggai RM 540,000 .
Kedua-dua premis nya mayar suwa rumah nya RM1,700 sebulan.
