KUALA LUMPUR: Opis Pelajar Tinggi (JPT) udah bejalaika sekeda inisiatif dikena mantu nembiak ngelempungka tanggung sida lebuh mayar yuran sekula.
Pekara tu diambi perati sepengudah ninga sebana ari bala nembiak sekula enggau apai indai bekaul enggau penusah ti ditapi sida sepemanjai timpuh pengelekai igi penyakit COVID-19 tu kelebih agi ari sukut belanja.
Ku Opis Menteri Pelajar Tinggi (IPT) madahka, sekeda ari inisiatif ti dipejalaika universiti perintah iya nya ngurangka sepenyampau 10 ngagai 35 peratus nyengkaum yuran servis, yuran buding, yuran konvokesyen sereta yuran aktiviti kolej.
Ungkup semester kedua sesi akademik 2019/2020 bisi RM75 juta wang turu udah diagihka iya nya RM20 juta wang turu ari perintah lalu RM55 juta agi ari universiti perintah empu.
Nangkanka nya, ungkup semester keterubah sesi akademik 2020/2021, yuran udah dikurangka ngagai RM70.2 juta lalu sesi kedua bisi RM40.5 juta pengurang udah diberi.
Inisiatif tu meri pemanah ngagai 386,142 iku pelajar lalu penyampau wang turu ti udah diagih dipelabaka manggai ngagai RM185.7 juta ungkup ketiga-tiga semester nya.
Inisiatif tu dikena mantu ngelempungka tating belanja sida nembiak bebayarka yuran kelebih agi dalam timpuh pengelekai igi penyakit tu.
