BINTULU: Mensia mayuh ke udah dituchuk dua dos vaksin COVID-19 enggau takah dua bulan sepengudah nerima dos kedua enda ibuh ngambi peresa chulit sebedau sida tama ke BIntulu.
Chairman Komiti Mutarka Penusah Ngenyit Menua (JPBB) Bintulu, Jack Aman Luat madah, taja pia pemutus nya deka diperatika baru ba ujung bulan tu nitihka gaya penyakit COVID-19 ba Bintulu.
Pemutus nya digaga JPBB dalam siti aum beserimbai enggau pengalih nengeri Sarawak ngagai Fasa Kedua Pelin Mulaika Pemanah Menua (PPN).
Pekara tu chukup beguna kena ngansak mensia mayuh ngerejister diri betuchuk vaksin enggau jampat ngambika sida ulih bejalai ke Bintulu.
“Sida ke bedau divaksin lalu deka tama ke Bintulu dipinta bejalaika peresa chulit COVID-19 lalu timpuh sah peresa nya pengelama 14 hari,” ku Chairman Komiti Mutarka Penusah Ngenyit Pelilih (JPBB) Bintulu, Jack Aman Luat.
Ba bulan Mac suba, JPBB udah netapka orang ke deka tama Bintulu mesti beperesa chulit.
Residen Bintulu udah berunding enggau Komiti Mutarka Penusah Ngenyit Sarawak (JPBNS) ngambika sektor ekonomi di Bintulu tau dibuka ari pukul enam pagi ngagai pukul sembilan malam.
Kelimpah ari nya, sida deka bebendar beratika gaya kes COVID-19 kelebih agi varian baru COVID-19 ti bisi ditemu di Sarawak.
