BINTULU: Pengawa nguji mai tama diesel enggau chara belalai udah mujur dipuntanka Raban Polis Marin Wilayah 5 (PPMW5) ditu sepengudah siti lori tangki ti mai 5,000 liter diesel ditan sida.
Diesel nya ditaga berega RM10,750, lalu lori nya ditan ba Jalai Bintulu-Tatau lemai Hari Satu, 12 Julai.
Pegawai Pemerintah Markas Operasi PPMW5 BIntulu, ASP Ezuandi Bahadin madah, raban iya benung bejalaika Ops Kontraban urung pukul 2.00 lemai sebedau Unit Risikan Marin (URM) tepedaka siti lori ti nyelai gaya, lalu terus meresa lori nya.
“Pengawa meresa nya tetemuka dua iku lelaki peranak menua beumur 30 enggau 40 taun ke bela enda ulih ngayanka surat pemendar mai diesel ari Opis Menteri Pengawa Dagang enggau Pekara Bebelika Barang (KPDNHEP) Bintulu,” ku Ezuandi.
Lori ti berega RM50,000 nya sereta diesel ti dibai iya udah diserah ngagai KPDNHEP Bintulu ngambika sida bejalaika atur ti patut.
Kes nya deka ditasat baruh Akta Kawalan Bekalan 1961.
