KUCHING, 11 Julai: PRojek Ngaga Rumah Seri Kenangan (RSK) sibu ke beungkus RM15.8 juta disadang tembu ujung bulan Semilan 2021.
Naka ke diatu, projek RSK udah manggai 90 peratus tembu taja napi pengelaun mimit ketegal tetanggul maya Atur Nagang Pemindah (PKP).
Menteri Muda Pengelantang Komuniti, Datuk Francis Harden Hollis madah, raban kunteriktor naka ulih nembuka projek RSK Sibu sebedau ujung bulan Semilan enti nadai penanggul ari PKP tauka penanggul bukai.
“Lama udah nganti deka bisi sebuah begunan baru ngengkahka raban orang tuai umur. Juluk kitai bedau nyadi nyata nyentuk ke proses nyerah begunan nya tembu.” ku iya maya matau pemansang projek RSK Sibu.
Iya ke mega Kaban Council Nengeri (Adun) Simanggang madah, projek fasa keterubah enggau skop kereja ngaga baru blok opis, dewan makai, buding lelaki enggau orang indu, rumah sekuriti, sistem hod gelung, menara tangki ai dilanggur deka digaga kena 2 Januari 2019 lalu disadang tembu 1 Januari 2021 napi pengelaun ketegal ari sekeda penanggul.
“Abis laun deka beoperasyen berengkah pun taun baru. Tu mungkur palan infrastrakcha ti diguna ungkup ngengkahka 20 lelaki enggau 20 orang indu.” ku iya.
Nitihka penerang, projek nya udah tiga kali diberi pemendar Extension of time (EOT) ke alai ba keterubah EOT 84 hari, EOT kedua 16 hari enggau EOT ketiga 62 hari lalu peminta EOT keempat benung dalam proses diperundingka.
Penyampau semua hari EOT ke udah dikemendar iya nya 162 hari.
Pengatur projek, Cerahjaya Rekabina Sdn Bhd nyadi kunteriktor nyemetak madah guna EOT ketegal napi penanggul berindik ari PKP.
