KUCHING, 10 Julai; Menteri Muda Pengintu Pengelantang Komuniti, Datuk Francis Harden Hollis bisi ngelimpangka diri ngelawa Palan Meri Vaksin (PPV) Palan Agape Sibu, kena Hari Enam, kemari.
Program tuchuk vaksin khas tu ungkup raban orang timpang pendiau (OKU) nyengkaum apai indai ti nyaga sida ke tanda sukung ngagai perintah dalam nyapai imuniti kelompok.
Harden ke mega Kaban Kunsil Nengeri (ADUN) Simanggang madah, opis menteri iya seruran nyukung penyereta gerempung ukai dikuasa perintah (NGO) mantu perintah ngenyampatka agi proses betuchuk vaksin.
“kitai meri puji kelimpah ngenyampatka proses meri vaksin ngagai semua rayat, aku meda, tikas pengasi sop manah enggau pengereja pengawa madahka chara proses vaksin dikena ngelancharka pengawa ba kaunter peresa,” ku iya dalam siti penerang.
Nitihka penerang ari Dr Toh Teck Hock, program meri vaksin berengkah dipejalai kena 16 nyentuk 18 Haribulan Enam ungkup dos keterubah ti ngaul 250 iku OKU nyengkaum apai indai tauka penyaga sida.
Kena 28 nyentuk 9 Haribulan Tujuh bisi 400 iku udah nerima vaksin.
Program vaksin dos kedua sepenyampau 375 iku udah betuchuk vaksin naka kemari enggau dijangka 1550 iku deka nerima vaksin di PPV nya.
Berebak enggau nya, Harden puas ati enggau kerejasama ari ngo mantu opis pengerai malaysia (kkm) ngelengkaska nagit juluk deka 80 peratus rayat sarawak dituchuk vaksin.
Program meri vaksin dijangka tembu kena 23 Haribulan Tujuh 2021 bagi PPV Palan Agape Sibu.
