KUCHING, 9 Julai – Siku lelaki ti dikangau ‘Dr. Shah’ ti nyaru diri nyadi lutur di Stadium Perpaduan, Kuching enda kala meri tuchuk vaksin di Palan Betuchuk Vaksin Sepital Besai Sarawak (HUS) tauka nyadi volunteer.
Ku direktor pengerai nengeri Sarawak Datuk Dr Mohamed Sapian Mohamed madah, lelaki nya nadai rikod tauka dokumen deklarasyen tetiap kali bejalaika pengawa.
Iya madahka, nama lelaki nya nadai dipasuk ke dalam rintai nama ti udah ditetapka opis menteri pengerai enggau raban volunteer di Palan Betuchuk Vaksin (PPV) Stadium Perpaduan.
Ku iya nambah agi, tuai stesyen ba PPV endang nentuka tetiap iku pekereja ngerejister diri lebuh tama tauka pansut gawa.
Berindik ari nya, semua lutur ti meri vaksin mesti bisi ngembuan setipikit Perakuan Pengamalan Tahunan sebedau bejalaika pengawa meri tuchuk vaksin ngagai mensia mayuh.
Iya mansutka jaku nya ba dalam siti penerang maya hari lima, seraya nerangka senentang berita lutur pelesu ti dibantaika ba ripot berita enggau media rama maya 7 hari bulan tujuh 2021.
Asil tasat ari opis pengerai nengeri Sarawak tetemuka ‘Dr. Shah’ datai sekali sekala ke PPV Stadium Perpaduan lalu berengkah dipeda ba PPV nya lebuh 16 hari bulan enam 2021.
Beduduk ari nya, Dr Mohamed Sapian madahka, sida udah mansutka gerah chakah agi bejalaika pengawa ngemaruka chara pengatur di PPV Stadium Perpaduan enggau Sepital Besai Sarawak dikena nyeliahka perkara nya nyadi baru.
Ku iya madah agi, tetiap iku raban volunteer enggau pekereja ti gawa di PPV Stadium Perpaduan mesti diberi pas ti ngayanka lumur lalu dibantaika ngagai raban polis ti gawa ba PPV.
Kelimpah ari nya, tetiap iku tuai stesyen bejalaika atur ti terit ba tetiap syif tauka gintir gawa di PPV.
