Kuching, 09/07/2021 – Lima lelaki peranak menua tu ditangkap ketegal nyadi operator tuie main bul EURO 2020 kenyau ari tengan bulan enam tu tadi.
Semua saspek ti beumur entara 17 nyentuk 25 taun nya dipelaba bisi ngatur tuie chara dalam tali arus (online) (JOL), ba sebuah genturung pendiau di Jalai Stutong ditu.
Nitihka penerang ari Tuai Polis bagi menua Kuching, ACP Ahsmon Bajah, sida nya ngatur tuie main bul ba sekeda genturung pendiau.
Asil pansik, sindiket tu dipechaya bulih untung lebih kurang RM40,000 ba pengawa Bookie enggau RM60,000 sebulan lebuh ngatur tuie chara tali arus.
Nangkanka nya, raban polis udah ngerampas mayuh macham kereban dikena Bookie Bul enggau tuie online baka sebuah set komputer, sebuah Ipad chap Apple, 5 buah telefon chulik bansa Iphone, sebuah telefon chulik bansa Samsung enggau ke bukai.
Kes tu dipansik nengah Seksyen 6(3) Akta Pertaruhan 1953 ti tau kena tinggang ukum maksimum RM200,000 sereta jil enda ngelui 5 taun, enggau Seksyen 4(1) Akta Rumah Judi Tebuka 1953 ulih kena ukum RM5000 nyentukka RM50,000 enggau ukum jil 3 taun enti ditemu salah.
Kelimpah ari dawa ari kourt, PDRM mega deka mutung bekal kuasa karan ba tetiap premis ke udah diperesa kelimpah ngeletak ukum nengah undang-undang pencegahan (POCA).
Penyalah betuie tu ulih ngeruga ekonomi menua ari sukut chukai lisin enggau chukai penatai pemisi.
