KUCHING: Kapit enggau pelilih Telang Usan di Miri dikenukuka nyadi kadang menua ti dijaga tauka dilindung ari pengelekai igi penyakit Tabin Jani Afrika (ASF).
Taja pia, nadai penyakit ASF diripot di Sarawak.
Pekara tu disahka Direktor Opis Servis Veterinar Sarawak (DVS) Dr Adrian Susin Ambud.
“Tim kami deka nyidi kes babi kampung ti mati ba Long Busan. Kitai bela nemu, Long Busan amat jauh ari Kapit. Naka ke diatu, proses nyidi nya benung bejalai,” ku Dr Adrian.
“Kelimpah ari nya, jani ke ditupi kitai agi selamat, semina babi kampung aja (enda temu selamat tauka enda). Kitai deka ngumpul sampel lalu nganjung iya ngagai makmal kena mansik pengamat penyakit Tabin Jani Afrika.”
Dr Adrian madah, Opis Servis Veterinar Sarawak bisi ngeripotka kes jani kampung ba Kalimantan Utara.
Tu ngujungka kedua-dua pelilih nya nyadi kandang menua ti dijaga ari pengelekai igi penyakit Tabin Jani Afrika.
“Kami bisi nerima ripot ari Kaodim Tribune, Indonesia. Berita nya ngeripotka bisi jani kampung ba sitak Nunukan, Kalimantan Utara. Berebak ari nya, Sabah udah kena rampit igi penyakit nya. Bisi 12 pelilih udah ditemu, nyadi kami melabaka babi kampung ke bisi kena penyakit tu ari Sabah enggau Kalimantan Utara ti semak enggau garis entara menua. Nya meh penyadi ti dipelabaka kami,” ku Dr Adrian.
Berebak enggau nya, iya ngelalauka orang ke nupi jani ba menua bukai ngambika bejaga sereta neritka agi pengelikun enggau enda ngemendarka orang tama kandang babi, sereta patut ngeripot ngagai Opis Veterinar ba menua ti semak nyema jani bisi mati ngenyit.
“Penyakit Tabin Jani Afrika tu ukai bansa virus ti tau ngerampit mensia. Sarawak kala bisi ASF, tang makai dagin jani endang selamat di Sarawak. Mensia mayuh enda ibuh irau ati.”
Sapit Kepala Menteri Sarawak, ke mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas ngaga pemutus ngelindung Kapit enggau Telang Usan laban kedua-dua endur nya semak enggau menua Nunukan sereta Krayan di Kalimantan Utara, Indonesia, ti bisi ngeripotka pengelekai igi penyakit ASF.
