KUCHING, 5 Julai: Pengawa ngagihka bantu di mengeri Kota Samarahan sepengelama semilan hari berengkah ari 4 nyentukka 12 hari bulan tujuh ngagai semua peranak Kota Samarahan udah dipejalaika lanchar ke diatur raban volunteer enggau Kunsil Mengeri Kota Samarahan (MPKS).
Bisi semilan buah palan bebelika barang di Kota Samarahan nyadi palan endur nyadung bantu barang pemakai ti dipejalaika berengkah pukul 3.00 lemai.
Entara palan bebelika barang nya iya nya Aiman Mall, Le Papa, Farley Supermarket, UNACO Supaermarket, Sen Sen Departmental, Emart Supermarket enggau H&L Supermarket.
Program ti dikumbai pantri komuniti nya nerima timbal ti manah ari raban penerima bantu.
Kelimpah ari nya, batang tuju pengawa meri bantu bekal pemakai nya dikena ngelempungka tating penusah ruang bilik ke lebih agi raban pekereja ke begaji hari, dikena napi pengidup sida sepemanjai timpuh PKP tu.
Sama bisi enggau maya pengerami nya mega Menteri Dagang Temuai, Seni, Main Asal, Nembiak Enggau Lumba Datuk Abdul Karim Rahman, Chairman Opis Kunsil Majlis Mengeri Kota Samarahan, Datuk Peter Minos enggau Chairman Komuniti Pantri Datuk Sim Kiang Chiok.
