KUCHING, 3 Julai – Pengelikun pengajar ba Palan Ngajar Anak Mit (Tadika) enggau pengibun ba Palan Nyeridi Anak Mit (Taska) di nengeri tu semampai dikemeratka perintah.
Baka ke ditemu mensia mayuh, raban tu entara orang ke suah betemu mua enggau bala anak mit lalu mesti diberatka nerima vaksin COVID-19.
Beduduk ari nya, entara raban ke mesti jampat nerima tuchuk vaksin.
Ku Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit (KWKPK), Datuk Seri Fatimah Abdullah madah, naka ke diatu bisi 6021 iku tauka 84 peratus ari raban nya udah nerima dos vaksin ti keterubah.
“Ba tadika ungkup pengajar bisi 3,185 iku ke udah nerima tuchuk vaksin ari penyampau semua iya nya 3,879 iku tauka kitai udah nyapai 82 peratus sida ke udah nerima dos keterubah.” ku iya madah lebuh ngematakan Palan Meri Vaksin Khas Orang Timpang Pendiau (OKU) Orang Bengal di UTC, Kuching maya hari lima.
Nangkan ke nya, Fatimah madahka, penulung pengajar bisi 2,059 iku tauka 89 peratus ari penyampau 2, 312 udah nerima tuchuk vaksin.
“Ba taska pengibun anak mit ke udah nerima tuchuk vaksin 640 iku ari 803 iku tauka 80 peratus. Kelimpah ari nya, penulung pengibun anak mit 137 iku ari 156 iku tauka 89 peratus.” iya madah agi.
Taja pan pia, iya madahka penyampau nya enda nyerangkung pra sekula iya nya ba baruh Opis Pelajar Malaysia (KPM).
Penyampau ke dikunsika nya semina ngaul sektor peribit aja.
