BINTANGOR, 2 Julai – Tuai Peranak enggau Tuai Raban Bansa (KMKK) di Bintangor diperansang terus bejalaika pengawa lebih chakah agi dikena nentuka peranak sida enda tinggal ari nerima tuchuk vaksin COVID-19.
Ku Kaban Kunsil Nengeri (ADUN) Meradong, Datuk Ding Kuong Hiing madah, tetiap iku tuai tu ngarika sesebengkah genturung pendiau lalu semina sida aja ulih nanya sereta ngelawa rayat sida empu.
“Sida aja ulih terus ngelawa peranak ba genturung pendiau sida empu, lalu sida mesti bejalaika pengawa ngiga peranak ke patut nerima vaksin datai ngelawa Palan Meri Vaksin (PPV) Bintangor betuchuk vaksin.” ku iya madah ngagai pengarang berita TVS maya hari lima.
Nangkan ke nya, lebuh ditanya senentang pengerembai program betuchuk vaksin di sitak DUN Meradong, program nya bejalai lanchar sereta nerima timbal ke manah ari rayat.
“Naka ke diatu bejalai lancar raban betuchuk vaksin mindah kin kitu ngelawa rumah panjai lalu minta tuai rumah meri rintai nama rayat sida lalu madah ngagai opis pelilih ngambika sida nerima tuchuk vaksin ari sebuah rumah panjai ke rumah panjai.”
Datuk Ding mega pechaya semua rayat di rumah panjai ulih nerima tuchuk vaksin nitihka timpuh ke udah ditetapka.
Kelimpah ari nya, pengawa nya mega dikemesaika ngagai genturung pendiau Cina enggau Melayu di sitak DUN Meradong.
Iya mega madahka tagit 80 peratus rayat di sitak nya nerima tuchuk vaksin ulih dijapai manggai ujung bulan lapan taun tu.
