KUALA LUMPUR: Malaysia nempa nama pengudah ia nyadi entara 10 menua ti ngembuan komitmen tinggi ngagai pengelikun siber nengah ripot Global Cybersecurity Index 2020 ti disediaka ulih Gerempung Telekomunikesyen Entara Bansa (ITU).
Menteri Komunikesyen enggau Multimedia, Datuk Saifuddin Abdullah madah, asil pansik ba 194 buah menua, Malaysia bulih 98.06 mata sereta nyulut ba penuduk kelima enggau Rusia sereta Emiriah Arab Bersatu ba renggat dunya.
Ba renggat Asia Pasifik, ku iya, Malaysia ba penuduk kedua pengudah Korea Selatan enggau Singapura ti sama bela bulih 98.52 mata.
“Penyulut tu lebih manah agi enti dibanding enggau taun 2018, ke alai menua maya nya ba penuduk kelapan,” ku Menteri Telekomunikesyen enggau Multimedia, Datuk Saifuddin Abdullah.
Iya mansutka jaku nya dalam siti penerang lebuh Hari Empat.
Saifuddin madahka Malaysia bulih penuduk 10 pemadu tinggi dalam dunya sepengudah iya bulih mata penuh 20.0 dalam tiga ari lima tikas prestasi besai Agenda Pengelikun Siber 2020 ITU, iya nya komponen undang-undang, pemansang kapasiti sereta kereja sama. lalu dua tikas agi iya nya teknikal (19.08) enggau organisesyen (19.98).
Iya enggau silik agi madah Malaysia ulih numbuhka raban pengelikun siber profesional ukai semina dalam menua, tang mega ba menua luar nengah skim setipikit profesional, pengelikun siber global ti sah, sereta nengah kereja sama enggau sektor perintah, peribit, industri sereta palan pelajar tinggi.
Kelimpah ari nya, ku iya agi, Malaysia mega aktif ngenegapka kereja sama ngelaban penyalah nguna siber ba renggat global nengah bemacham pelasar entara bansa.
“Kereja sama mega ditempa begulai enggau kaban serantau ASEAN baka Filipina, Indonesia, Laos, Myanmar, Kemboja, Thailand enggau Vietnam sereta United Kingdom, Korea Selatan, Itali enggau Australia,” ku Saifuddin.
