KUCHING, 1 Julai: Dianggarka sepenyampau 79,000 iku peranak di pelilih menua Sri Aman nerima tuchuk vaksin manggai ba bulan Ogos tu ila.
Menteri Penyanding Penemu Komiti Mutarka Penusah Ngenyit Bagi Menua (Jpbb) Sri Aman, Datuk Francis Harden Hollis minta komiti pemansang enggau pengelikun genturung pendiau (JKKK) meransang nembiak redak sida rejista jampat ngambika ulih nyapai imuniti kelompok.
“Aku ngelalau bala mayuh lebih agi minta bantu ari tuai bansa, temenggung, pemancha, penghulu, kapitan, tuai rumah nesau sida ke bedau nerima vaksin anang laun lalu rejista jampat ungkup ke pengelikun diri ngambika enda kena rampit igi penyakit Covid-19” ku iya lebuh ditelefon pengarang berita TVS .
Harden ke mega Menteri Muda Pengelantang Komuniti madah, dianggarka 3,000 dos vaksin sehari diberi ba baruh program tuchuk vaksin bagi menua Sri Aman nengah palan meri vaksin (PPV) Dewan Suarah Sri Aman, PPV Sri Pantu, PPV Lingga Nyengkaum Komplek Sukan Lubok Antu dikena nyapai tagit nya.
“Ba program outreach tu, kitai ngena servis lutur terebai ke alai bala lutur enggau indu misi ke rumah panjai ungkup kandang menua pesisir ngambi ngenyampatka agi proses betuchuk semua peranak di Sri Aman,”ku iya.
Ba awak ke sama iya minta peranak nitihka standard atur pengawa (SOP) baka anang begelumu, sesegap pansut nadai kebuah sereta nyaga takah enggau pangan diri dikena nagang pengekai igi penyakit Covid-19.
