SARIKEI, 30 Jun – Peranak di serata nengeri tu dilalau mesti nguna duit turu ke diberi manah-manah.
Tebal agi, bantu geran projek mit menua pesisir (MRP) ke udah diungkupka ngagai sida.
Ku Kaban Kunsil Nengeri Pakan, Tan Sri William Mawan Ikom madah, geran MRP iya nya duit turu ti dikena ngelantangka pengidup rayat nengah penumbuh organisasyen ke sah ungkup pengelantang semua.
“Pengawa ngagih mrp tu dikearapka meri penguntung ngagai rayat tauka penerima bantu dikena nampung belanja sekalika pemansang ba sesebengkah genturung pendiau tauka rumah panjai, dikena ngatur aktiviti tauka dikena ngatur peminta guna ke bukai.” ku iya madah ba dalam siti program nyerahka geran MRP di Opis Pelilih pakan maya hari dua.
Beduduk ari nya, Mawan mega meransang tetiap organisasyen ke bisi nerima geran nya ulih nganjung ripot betulis bekaul enggau tetiap ungkup dikena nentuka duit turu diguna enggau chara ke betul.
Bisi 13 organisasyen ti nyerangkung Biro Orang Indu, Komiti Pemansang enggau Pengelikun Genturung Pendiau (JKKK) sereta pengari tadika Nanga Nangsang Pakan nerima geran ke diberi ngagai sida.
Kelimpah ari nya, Mawan madahka, perintah Sarawak meri duit turu nengah Program Transformasyen Menua Pesisir (RTP) ti mai tuju dikena ngemansangka rayat ke mendam di menua pesisir ti nyengkaum genturung pendiau bukai sereta rumah panjai.
Naka ke diatu, program RTP nya nerima timbal ke manah ari rayat.
