Zon Mirah Meri Penanggul Ngenyampatka Proses Betuchuk Vaksin

KUCHING, 28 Jun: Dikena nyapai juluk imuniti kelompok, raban pemesai perubat sanggup napi mayuh macham pemar sepemanjai bejalaika Program Betuchuk Vaksin Covid-19 Menua.
Dianggarka lebih kurang 70 peratus tauka 45,000 iku peranak di bagi menua Kapit udah nerima tuchuk vaksin naka 27 Jun 2021.
Nitihka Pemesai Pengerai Bagi Menua Kapit, Dr Hamidi Bin Mohamad Sharkawi, entara penanggul ke besai ditapi dalam ngenyampatka proses tuchuk vaksin iya nya agi mayuh kandang endur di Kapit mengkang aktif Covid-19.
“Naka ke diatu kitai napi dua pemar besai, keterubah iya nya kandang endur agi aktif Covid-19 di Kapit agi mayuh, meri penanggul ba atur pejalai proses betuchuk vaksin kepada semua peranak di Kapit.
“Nyadi dikena mutarka penanggul tu kitai deka mansik baru atur pejalai program enggau ngarap kitai naka ulih nentuka kandang endur ditu ulih betuchuk vaksin nitihka hari bulan ke udah ditetapka.Kedua, iya nya pemisi vaksin dos tunggal laban kitai endang begunaka amat vaksin dos tunggal tu ba kandang endur ke jauh tusah bejalaika tuchuk vaksin. Tu ketegal enti nguna vaksin dua dos, deka meri pemar dalam nyamin kualiti vaksin sereta berisiko besai ulih rusak.” ku iya lebuh ditelefon pengarang berita TVS kena Hari Dua.
Nya alai, ku iya madah beguna amat bekal vaksin dos tunggal dilengkaska dikena ngenyampatka proses tuchuk vaksin .
Kelimpah ari nya, program tuchuk vaksin ti nguna servis lutur langit mega deka dipejalaika di Kapit ngagai kandang endur ke jauh ba menua pesisir dikena nentuka semua peranak nerima vaksin.
“Kelimpah ari ‘mobile outreach’, naka ke diatu kitai deka nguna servis lutur langit sebagi agi mobiliti dikena bejalaika pengawa meri tuchuk vaksin Covid-19 ngagai peranak di Kapit ke diau di menua pesisir” ku iya.
Taja napi mayuh pemar tang proses tuchuk vaksin bejalai enggau lanchar.