Tiga buah genturung pendiau ti benung bejalaika kuarantin diberi bantu pemakai.
Bantu nya diagih Opis Pengintu Pengelantang Raban Bansa (JKM) bagi menua Limbang maya hari empat.
Ku Kaban Kunsil Nengeri (ADUN) Batu Danau, Paulus Palu Gumbang madah tu bagi mantu nagang pengekai igi penyakit covid-19.
“Aku minta peranak ti benung bejalaika Home Quarantine Order (HQO) tauka kuarantin di rumah bejalaika tanggungpengawa nitihka SOP ke udah ditetapka dikena nagang pengekai Covid-19”. Ku iya madah maya nyuaka bantu nya ngagai tiga buah genturung pendiau.
Bisi 22 iku peranak kontak semak kes positif Covid-19 ke benung bejalaika kuarantin iya nya 16 iku peranak di Rh Madline Kampung Merutop Tengah, dua iku peranak Rh Suring Kampung Merasam Pandaruan enggau empat iku peranak Rh Kalat Kampung Penganan Gudang.
“Penyampau 22 pek bantu bekal pemakai diberi ngagai Volunteer Kebajikan Kawasan Kubong Pandaruan Andria Ujan ti diketuaika 14 iku Tuai Isi Rumah (KIR) bagi ketiga-tiga kampung nya” ku iya.
Antara bantu nya nyengkaum berau ,ruti, gula, pemakai tin, kupi enggau garam ti berungkus RM50 bagi siku penerima dikena nampung belanja ninting hari nyentuk timpuh kuarantin ambis.
Paulus mega ngelawa projek Transformasyen Menua Pesisir (RTP) Dewan Serbaguna Kampung Semabat, Kubong Pandaruan ti deka tembu sereta pengawa ngaga gerija nengah ungkup Unit Pekara Pengarap Bukai (UNIFOR).
