Gerempung Nagang Dadah Malaysia (PEMADAM) Sarawak enggau kereja sama Opis Pelajar Nengeri (J-P-N) deka neruska program nagang kes nguna dadah ba sekula di nengeri tu.
Menteri Nembiak Lumba Enggau Main, Datuk Abdul Karim Rahman Hamzah madah, taja pan isu dadah di nengeri tu enda balat baka di nengeri bukai, program baka tu tetap dipejalaika ba sekula.
Iya mega madah, program tu dikena ngajar raban nembiak ngambika nyeliah diri ari penyalah nguna dadah.
“Nya alai, PEMADAM Nengeri Sarawak setuju bejalaika program baka tu sereta gawa begulai enggau Opis Pelajar Nengeri Sarawak ngambika tiap iti sekula diberi RM1,000. Penyampau tu mimit, tang tu ulih ngatur program bekait enggau dadah,” ku Datuk Abdul Karim Rahman Hamzah madah nengah siti penerang ba laman Facebook iya.
Iya bejaku munyi nya lebuh nyuaka pemeri RM139,000 ngagai opis pelajar nengeri kemari.
Nangkanka nya, pemeri nya deka diagih ngagai 193 buah sekula di nengeri tu ungkup tuju ti sebaka.
“Ari bulan satu nyentuk ngagai bulan lima, PEMADAM udah meri wang turu RM36,000 ungkup program ti baka tu,” iya nambah.
Kelimpah ari nya, program ti baka tu ukai semina naka nya aja, tang deka dipejalaika enggau chakah agi ba renggat sekula di nengeri tu.
