BETONG, JUN 23 : Vaksin siti dos Cansino disadang datai tengan bulan 7.
Pekara tu dipadahka Chairman Komiti Penyangga Penusah (JPBN) Sarawak, Datuk Amar Douglas Uggah Embas lebuh ngemataka program betuchuk vaksin ba Balai Mensia Mayuh di Spaoh.
Iya ke mega Sapit Kepala Menteri Sarawak madahka Sarawak udah ngudar 650,000 dos vaksin nya ungkup rayat menua tu. Vaksin tu engkeman diberi ngagai sida ti diau di menua ulu enggau menua pesisir laban vaksin tu semina diberi siti dos aja tauka sekali tuchuk.
Tang diatu ku iya bisi sekeda kampung di begian Miri, begian Kapit udah diberi vaksin Sinovac. Tuju meri vaksin laban bisi kes igi penyakit Covid-19 ditemu ngerekai dia. Chara tu dikena ngambi ulih ngerumban pengawa betuchuk vaksin ngagai sida ti diau ba menua pesisir sereta ulih nagang igi penyakit ngerekai ngagai menua nya.
“Ba menua pesisir, kitai enda nguna chara bererenggat. Kitai ngelawa kampung Nanga Tiga, kitai meri vaksin ngagai semua peranak ti diau di kandang endur nya. Kitai mega nguna chara tuchuk sereta rejister, enda ibuh nguna aplikasyen MySejahtera laban mayuh peranak ti diau kandang menua pesisir enda nguna aplikasyen nya”.
Iya munyi nya lebuh ngemataka program betuchuk vaksin ba Dewan Mensia Mayuh ba Spaoh, Betong.
Uggah ke mega Menteri Betanam Betupi Moden, Tanah Adat enggau Pemansang Kandang Menua madahka iya berasai gaga sereta tepantup ati laban naka ke diatu 35,312 iku udah diberi dos keterubah vaksin lalu 7,236 udah diberi dos ti kedua.
Sama ngulu program tu iya nya Kaban Parlimen Betong Datuk Robert Lawson Chuat, sekretari politik Sapit Kepala Menteri Dr Richard Rapu, Pemesai Begian Betong Friday Belik enggau Dr Johnny Pangkas.
