Rejister betuchuk vaksin ngena chara hibrid tauka mayuh macham, dipeda ulih ngelancharka program meri vaksin kelebih agi ungkup peranak menua pesisir.
Baka di palan meri vaksin (PPV) di pelilih serian ti nyengkaum Serian, Siburan enggau Tebedu, penyampau orang ngerejister diri ngena chara manual dipeda lebih mayuh agi ari penyampau nengah MySejahtera.
Ku Sapit Kepala Menteri Datuk Amar Douglas Uggah Embas, pelilih menua Serian enggau Siburan ngerikodka 44,386 iku orang ngerejister diri ngena chara manual enti dibanding enggau 30,831 iku ti ngerejister diri nengah MySejahtera.
Uggah ke mega bisi sama datai ngelawa PPV ba dewan mensia mayuh Serian maya hari dua madahka diri puas ati enggau pengerembai nya.
“Terima kasih ngagai rayat ke datai betuchuk vaksin. Sehari tu (Hari dua) mayuh orang datai nyentukka palan tu dipeda sekut. Tu mih siti pengerembai ke chukup manah, ti dikedeka ke kitai. Di menua pesisir, kitai bisi ngena chara MySejahtera enggau chara manual lalu tu dipeda ulih ngenyampatka program betuchuk vaksin,” ku iya maya penemuai ngagai PPV Serian maya hari dua.
Naka hari satu, bisi 33, 193 tuchuk udah diberi di pelilih menua Serian. Nangkanka nya, Uggah ke mega chairman komiti mutarka penusah ngenyit nengeri Sarawak JPBNS madahka, Sarawak diatu manggai fasa ketiga program betuchuk vaksin COVID-19 menua.
Ba baruh program tu, fasa keterubah ungkup raban gawa di luan, fasa kedua ungkup orang tuai umur enggau raban rentan.
“Berengkah sehari tu (Hari dua) nadai agi fasa. Semua ti beumur 18 taun ke atas dikemendarka nerima vaksin. Di menua pesisir, kitai endang nadai ngena fasa ketegal pekara tu ulih mai penanggul,” ku iya nambah.
Ba pengerembai ke bukai, berindik ari dos fasa keterubah vaksin Astrazeneca udah abis, Uggah nerangka stok ungkup dos kedua deka datai enda lama agi.
