KUALA LUMPUR: Palan darah menua napi pengurang bekal darah, kelebih agi maya menua benung napi pandemik COVID-19 ti natak pemindah mensia mayuh.
Tuai Direktor Pengerai, Datuk Dr Noor Hisham Abdullah, madahka pemayuh orang ke meri darah udah nurun nyentukka bekal ti bisi dalam bank darah udah nurun 40 peratus.
Malaysia begunaka lebih kurang 2,000 paket darah sehari dikena nampung peminta 1,000 orang sakit.
“Aku bisi dipadah, urung 2,000 paket darah ti diberi rayat Malaysia mesti bisi kena mantu 1,000 pesakit ninting hari. Aku temegah ati enggau rayat Malaysia. Enti nadai kita sapa meh kami,” ku Dr Noor Hisham.
Sapit Direktor 1 Palan Meri Darah Menua, Dr Tun Maizura Mohd Fathullah madah, pemereti pasal pemesai guna meri darah agi kurang, lalu pengawa meri darah mesti dikereja enggau konsisten, iya nya sekali dalam timpuh tiga tauka empat bulan, tauka dua kali setaun ngambika bekal darah enda putus sereta meruan ba tikas ti likun.
Perintah mega udah bejalaika Standard Atur Pengawa (SOP) ti engkeman ngambika mensia mayuh enda takut nurun meri darah ba palan darah sepemanjai timpuh Atur Nagang Pemindah (PKP).
Atur tu ulih ngemudahka sereta ngelancharka agi proses meri darah sereta meri awak ngagai mensia mayuh meri darah lebuh maya pandemik baka ka diatu.
