KUCHING: Peranak menua Sarawak mesti ngasika atur ti udah ditetapka kena nagang pengelekai COVID-19 enti nengeri tu bejalaika pengawa bepilih ti ke-12 (PRN12) sepengudah timpuh darurat tembu ila.
Sapit Kepala Menteri, Tan Sri James Jemut Masing, madah, atur nya nyengkaum pengawa ngemanahka agi tikas pengerai mensia mayuh, penagang betemu maya bekimpin, penyampau pekereja komiti pengawa bepilih ti chukup, sereta peti undi ti dibai ngagai pengundi.
Ba kandang menua pesisir, timpuh bekimpin tau enda ibuh kelalu lama lalu jam ngundi mega ulih dilanjar ngambika mensia mayuh ulih nyaga seraka fizikal.
“Kitai mesti nitihka undang-undang. Undang-undang madahka PRN12 di Sarawak mesti diatur maya bulan sepuluh taun 2021,” ku Masing.
Masing madah, PRN12 patut diatur sebedau bulan Oktober taun tu enti sema Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ngetuka darurat ba pun bulan lapan ila, laban undang-undang udah netapka pengawa bepilih tu mesti dipejalai dalam timpuh dua bulan sepengudah darurat tembu.
