KUALA LUMPUR, 13 Jun- Perintah deka mantaika pelin mulaika pemanah menua ba minggu baru dikena nentuka sistem pengerai nyengkaum ekonomi rakyat enda tekeruga berindik ari pandemik Covid-19.
Menteri Besai, Tan Sri Muhyiddin Yassin madah, taja pan kes Covid-19 dipeda bisi nurun tang sektor pengerai menua patut terus dibantu.
“Pelin tu deka diaduka silik enggau bererenggat, taja kes covid-19 bisi tanda nurun, tang kitai bedau ulih ngerami nya laban kitai mesti mantu sektor pengerai menua ngambika enda labuh,” ku iya.
Perintah mega deka nentuka sepital chukup katil, ventilator, oksigen, raban pemesai sepital nyengkaum bala lutur.
Semua pekara nya udah dipejalai tang penyampau kes pemati dirikodka ba menua tu agi tinggi.
“Taja kes diatu udah nyapai 5,000 lebih (sehari), tang aku bedau puas ati enggau kitai deka ngiga chara kena mutarka nya,” ku iya sepengudah nemuai ngagai klinik tuchuk vaksin kin kitu ba Projek Perumahan Rakyat Seri Johor, sehari tu.
Sentang isu ekonomi rayat, perintah deka ngiga chara nyemelaka pengawa nagang pengekai Covid-19 enggau negapka ekonomi menua.
Ku iya, kitai enda ulih beratka ngagai siti pekara aja ba pelin nya tang mesti beratika sukut ekonomi.
Tu laban perintah enggai rayat enda makai, nadai kereja nyema Covid-19 tu udah punas laban tu penanggul menua enggau pekara ke dikeirau mesti diambi kira.
