KUCHING, 9 Jun : Sapit Kepala Menteri Sarawak, Tan Sri James Jemut Masing ngansak Opis Pelajar Malaysia (KPM) mansik baru hari kemisi sekula primari enggau sekondari di serata menua.
Tu ketegal KPM patut ngiga chara dikena nganti timpuh jam nembiak belajar ti udah tebasau semanjai pandemik Covid-19.
Ku Masing nambah, KPM enda patut nunda hari kemisi sekula baka taun ke sebedau tu ti bisi tiga kali kemisi sekula dalam setaun nyengkaum kemisi hari besai.
“Aku asa ati ke alai KPM agi enda bejalaika pengawa baka selama lalu timpuh kemisi ba kalinda agi baka suba” ku iya.
KPM patut nelebaka diri enggau norma baru chara belajar enggau ngajar (PDP) maya pandemik laban enti enda tu ulih meri empas ngagai pelajar nembiak dudi hari ila.
Masing ke mega Kaban Council Nengeri (ADUN) Baleh nyemetak madahka, Standard Atur Pengawa (SOP) ari Opis Pengerai Malaysia (KKM) udah ngetuka sebarang aktiviti ti ngaul nembiak di sekula.
“Taun 2020 mayuh mai pengerugi ke besai ngagai nembiak sekula lebih agi nembiak menua pesisir ti nadai bungkur internet lalu PDP ari rumah ukai kedeka sida”
Nya alai, nyema gaya pengekai Covid-19 tu enda ulih ditagang, sukut pelajar menua ba taun 2020 tu deka nyadi baru ba taun dudi hari ila.
