KUCHING: Empat belas iku orang ditan polis ba sebengkah palan pemerindang di Jalai Canna ditu urung pukul 10.30 malam Hari Dua.
Sida ke ditangkap nya 12 iku lelaki enggau siku indu ari menua tu empu sereta siku indu ari menua China, ke beumur entara 20 ngagai 30 taun.
Dalam siti penerang, Tuai Polis Pelilih Menua Kuching, ACP Ahsmon Bajah, madah tiga ari sida ditemu positif dadah bansa ‘methamphetamine’.
Kelimpah ari nya, polis mega bisi tetemuka dua paket plastik ti ngundan ketamin enggau pil ‘ecstasy’ ngemerat 45.7 gram.
Semua sida ke ditangkap nya dikompaun RM1,500 siku, lalu pengempu palan pemerindang dikompaun RM50,000 nunda Atur 17(1) Akta Nyeliah Enggau Nagang Penyakit Berampit Pindaan 2021.
Tiga iku ari sida ke ditemu positif dadah ditasat baruh Seksyen 39A(2) enggau Seksyen 12(2) Akta Dadah Berbahaya 1952. – TVS
