KUCHING: Universiti Teknologi MARA (UiTM) Kampus Sarawak udah dipilih nyadi pengatur program MyCareer @ MOHE Zon Borneo (Sarawak) ulih Opis Menteri Pelajar Tinggi Malaysia (MOHE).
Program tu deka diatur ngena chara ‘online’ kena 24 (Hari Satu) enggau 25 Mei (Hari Dua) ti deka datai tu ila nitihka atur operasi standard dikena nagang pengelekai igi penyakit COVID-19.
Tuju program tu kena ngangkatka pengelaku graduet kelimpah ari nyikap sida napi penguji lebuh bekereja.
“Mayuh aktiviti manah deka diatur sepemanjai program baka interbiu karier, siri webinar enggau panel ti nyulut sereta peresa karier,” ku siti surat penerang ari UiTM.
Universiti Malaysia Sarawak (UNIMAS), Universiti Kolej Teknologi Sarawak (UCTS), Universiti Swinburne Sarawak, Universiti Kolej I-CATS, Centre of Technical Excellence (CENTEXS), Kolej Komuniti Kuching enggau Politeknik Kuching, lalu kaban strategik program tu iya nya Gerempung Pengelikun Sosial (SOCSO) nyadi pengatur bukai dalam program tu.
Urung 30 buah kompeni ari mayuh bengkah industri mega bisi ngaum program tu.
“Semua graduet dilalau ngena peluang tu ngiga pengawa ti patut kelimpah ari peluang ngulihka penerang ari kompeni ti bisi ngaum program tu. Sesi interbiu ‘online’ mega bisi dalam program tu,” ku penerang UiTM.
Sida ke deka nemu lebih mayuh agi pasal program tu ulih nanya pengatur nengah ‘Bahagian Rangkaian Perindustrian dan Penyelidikan’ (PJI) ba lumur telefon 082-678200.
