KUALA LUMPUR: Sarawak ngembuan potensial besai enggau ulih nyungkak ba pengeluar pemakai
menua.
Ngambi ripot ari BH Online, Sapit Menteri Opis Menteri Betanam Betupi enggau Industri Pemakai,
Datuk Seri Ahmad Hamzah madahka opis menteri meri komitmen enggau bebendar dalam
merambu, ngaga sereta ngangatmanah tikas perengkaguna infrastrakcha betanam betupi ba
selampur menua, nyengkaum di Sarawak.
Ku iya, potensi nya endang signifikan enggau penumbuh empat Kandang Endur Pemansang Betanam
Betupi Besepadu (IADA) ke baru, ti mekuh ba pengawa nanam padi.
Ku iya nerang, nyentuk ke diatu, wang turu penyampau RM337.9 juta ungkup pemansang udah
diberi ke Sarawak ari baruh RMK Ke-11, ngaul ungkup bepelasarka ‘Rolling Plan’ (RP) pengelama lima
taun ti abis ba taun tu.
Iya bejaku munyi nya lebuh nyaut tanya Datuk Robert Lawson Chuat (GPS-Betong) ti deka nemu
tunga kuing program pemansang infrastrakcha betanam betupi enggau tali ai betanam betupi di
Sarawak bagi RMK Ke-11 ti abis taun tu, maya ba aum Dewan Rakyat, sehari tu.
Ku Ahmad madah, opis menteri mega udah ngungkupka sepenyampau RM6.7 juta ba baru Pakej
Rangsangan Ekonomi (PRE) 2020 ngagai sekeda ejensi bejalaika pengawa di Sarawak.
Ku iya, tuju pekara tu dikena bejalaika pengawa ngemanahka infrastrakcha betanam betupi ke bisi
enggau jalai endur betanam betupi di selampur Sarawak.
