Perintah netapka rega kit meresa antigen COVID-19 RM19.90 seiti
99.71 Peratus Kes Positif Di Sarawak Kategori 1 Enggau 2
KUCHING, 1 September; Sarawak sehari tu ngerikodka 2,407 kes positif Covid-19 enggau tujuh kes pemati.
Ari penyampau nya, 99.71 peratus kes iya nya ba kategori 1 enggau 2 semina tujuh kes kategori 4 enggau 5 ti nyadika penyampau semua kes di Sarawak nambah ngagai 118,972 kes.
Komiti Mutarka Penusah Ngenyit Nengeri (JPBN) Sarawak dalam siti penerang, Kuching mengkang ngerikodka kes pemadu tinggi iya nya 1031 kes, ditangkanka Bintulu (174), Sibu (121), Subis (115), Betong (107), Sri Aman (92), Bau (91), Simunjan (76), Samarahan (73), Asajaya (64), Serian (60), Tebedu (55), Limbang (53), Song (49), Miri enggau Kapit (33), Tatau (32), Saratok (31), Lawas (21), Selangau (19), Lubok Antu (17), Lundu enggau Pusa (13), Sarikei (11), Belaga enggau Kanowit (6), Sebauh (5), Mukah enggau Bukit Mabong (4), Pakan (3) lalu Dalat enggau Meradong (1).
Nangkanka nya, bisi 2,238 kes udah gerai enggau dikemendarka pansut ari sepital.
Penyampau semua kes udah gerai manggai 92,156 iku tauka 77.46 peratus naka 1 Haribulan Lapan 2021.
Kelimpah ari nya, JPBN mega madahka bisi dua kluster baru diripotka iya nya Kluster Menuang Baru, Limbang enggau Kluster Sebayang-Stalun, Limbang.
Kluster Menuang Baru, Limbang iya nya kluster komuniti ti ngaul sebuah rumah panjai di Rumah Manggi Kampung Menuang Baru, Jalai Tedungan, Limbang.
Ari 174 iku diperesa 70 ditemu positif Covid-19 lalu sida udah diengkah ba Sepital Limbang enggau PKRC Limbang.
Kluster Sebayang-Stalun, Limbang mungkur kluster endur gawa ba palan projek Sabah-Sarawak Pipe Gasline (SSGP) di Kem 4, Kem Stalun Fly enggau Kem Sebayang di Long Rayeh.
Sehari tu mega, diripotka bisi dua kluster udah punas iya nya Kluster Duyoh, Bau enggau Kluster Kampung Pueh, Lundu pengudah nadai ngerikodka kes dalam timpuh 28 hari.
Menira Jalur Gemilang dituat ba Batang Lupar
Nerenak Pengandal Sayauka Menua Nengah Program Gambar Kreatif Hari Kemerdekaan
KUCHING, 31 Ogos; Sekula Primari St Augustine, Betong ngatur Program Gambar Kreatif beserimbai enggau Hari Kemerdekaan Malaysia ke-64 ba taun 2021 tu berambaika jaku ‘Aku Anak Malaysia’.
Tuju tu dikena ngerami Hari Merdeka seraya nyaut kimpin perintah Kibar Menira Malaysia enggau Menira Nengeri Sarawak taja dalam timpuh pandemik Covid-19.
Mandal YDP SK St Augustine Betong, Henry Jugah madahka, nyadi rayat Malaysia, kitai patut ngambi peluang meretika reti kebendar ‘Kemerdekaan’ laban nya ukai semina retorik sentang sejarah aja.
“Kitai mesti mantaika temegah ati nyadi anak Malaysia enggau bela sama nerenak pengandal sayauka menua ba diri empu,” ku iya lebuh dirandau pengarang berita kena Hari Satu.
Ku iya madah, Hari Kemerdekaan pelasar alai kitai nunjukka pengerindu ba penyerakup pupu bansa bepanggai ba siti rambai jaku ‘Malaysia Prihatin’.
Kelimpah ari nya, nengah tu mega ulih nempa kaul ti rat sereta taluk ke menua diri nyadi peranak menua Sarawak.
Ba awak ke sama, iya madahka program ke diatur sekula tu ukai bepekit tang semina minta nembiak nganjung gambar kreatif ngintu Hari Merdeka.
Program tu tebuka ngagai semua nembiak primari ba Sekula St Augustine lalu ke diatu bisi 36 iku nembiak udah nyereta.
Lelaki Parai Pengudah Tekena Taji Manuk Diri
KUCHING, 30 Ogos; Siku lelaki disahka parai pengudah tekena taji manuk sabung diri maya nyabung ba ladang sawit di Batu 21, Jalai Bintulu-Miri, Bintulu kena Hari Minggu.
Komisioner Polis Sarawak, Datuk Aidi Ismail madah, lelaki ke beumur 42 taun nya diripotka benung nyabung sebedau manuk iya bebali nyerang tudah ngujungka iya kaki balat bedarah tekena taji manuk ba penusah nya ti nyadi urung pukul 2 lemai.
“Lelaki nya disahka parai maya ba Sepital Bintulu,” ku iya dalam siti penerang sehari tu.
Bisi enam iku saspek ditangkap raban bekuasa Begian Tasat Pengawa Jai (JSJ) ari Indu Opis Polis Pelilih Bintulu dalam kes nya.
Kes ditasat ba baruh Seksyen 3 (1) Langkah-Langkah Pencegahan dan Penganiayaan Terhadap Binatang 1952 / Seksyen 269 Kanun Keseksaan.
Kes mega ditasat ba baruh Atur 17 (1) Atur Nagang enggau Nyeliah Penyakit Berampit (Atur Bejejaga Ba Kandang Endur Berampit) Pelin Mulaika Pemanah Menua 2021.
Jong Ngemegahka Malaysia Pengudah Bulih Midul Perak Ba Lumba Paralimpik Tokyo
KUCHING, 30 Ogos; Atlet Paralimpik menua, Jong Yee Khie ngemegahka Malaysia pengudah bulih midul perak dalam kategori Powerlifting 107kg (lelaki).
12 PATI nguji tama belalai ke Sarawak diburu pulai
KUCHING, 30 Ogos; Bisi 12 iku peranak menua luar nadai pemendar (PATI) diburu Soldadu Darat nikal pulai pengudah nguji tama belalai ke Sarawak nengah jalai chit ba dua bengkah endur kena Hari Minggu.
Jurujaku Sel Perhubungan Raya Markas Divisyen Pertama Infantri Malaysia madah, tiga iku lelaki diperchaya PATI ditemu bejalai kaki tama ngagai garis entara menua Malaysia ari Kampung Strass, Serikin Bau sebedau diburu pulai urung pukul 2 lemai.
“Pengudah ditanya enggau ditasat, semua sida beumur entara 20 nyentuk 35 taun nadai ngembuan sebarang dokumen pejalai ke sah ti nguji deka ke Malaysia laban deka ngiga kereja,” ku iya dalam penerang sehari tu.
Nangkanka nya, raban soldadu mega bisi muru pulai semilan iku PATI ari Indonesia di Biawak, Lundu urung 4.45 lemai ti nguji tama Malaysia nengah jalai chit.
Pengudah ditasat, ari semilan PATI nya enam iku lelaki enggau tiga iku indu nyengkaum siku anak mit beumur 7 taun nadai mantaika dokumen pejalai ke sah.
Sida madahka diri deka ngiga kereja di Malaysia lalu semua PATI diburu enggau udah diripotka ngagai Balai Polis Bau enggau Lundu.
Berebak enggau nya,raban soldadu Sarawak deka chakah agi nyaga pengelikun garis entara menua enggau kerejasama ejensi penerit adat nengah operasyen ‘Op Benteng’ dikena nagang aktiviti PATI enggau kes pengawa jai.
128 gerempung sitak DUN Simanggang nerima MRP beungkus RM402,000
Raban Nembiak PBB nyambut manah penyiri Menteri Kabinet
KUCHING, 28 Ogos: Raban Nembiak Parti Pesaka Bumiputera Bersatu (PBB) nyambut manah penyiri 10 pengari Sarawak nyengkaum lapan ari Gabungan Parti Sarawak (GPS) dalam kabinet baru ba baruh pegai Menteri Besai, Datuk Seri Ismail Sabri Yaakob.
Ketuai Raban Nembiak PBB Sarawak, Gerald Rentap Jabu madah, tu nyanganka Sarawak terus diberi basa ba rintai Menteri Kabinet ti diteritka berengkah Hari Satu, kena 30 Ogos 2021.
“Kitai pechaya rintai kabinet ti deka dipadahka kemari deka negapka agi menua ti mekuhka ba pengawa nentuka penegap politik seraya nagang pandemic Covid-19 enggau mulaika pemanah ekonomi menua ke pengelantang rayat,” ku iya dalam siti penerang sehari tu.
Iya ke mega Kaban Kunsil Nengeri (ADUN) Layar meri terima kasih ngagai Menteri Besai ti udah meri pengarap ngagai pengari Sarawak.
“Raban Nembiak PBB andal semua ke dichiri ulih bejalaika pengawa enggau manah dalam napi pemar pandemik, politik sereta ekonomi,”ku iya.
Berebak enggau nya, iya arap nengah ‘Keluarga Malaysia’ sereta kaul entara parti krisis pengerai ketegal pengekai igi penyakit Covid-19 ulih diputarka.
Sebedau tu, Menteri Besai Datuk Seri Ismail Sabri Yaakob madahka rintai kabinet baru pengudah dipesetuju Yang di-Pertuan Agong kemari.
Bisi empat iku kaban parlimen ari Sarawak megai portfolio nyadi menteri penuh enggau enam agi nyadi sapit menteri.
Entara sida tu iya nya Datuk Seri Fadillah Yusof nyadi Menteri Kanan Kereja Raya; Datuk Seri Wan Junaidi Tuanku Jaafar nyadi Menteri ba Opis Menteri Besai (Parlimen enggau Undang-Undang); Datuk Seri Alexander Nanta Linggi (Menteri Dagang Dalam Menua enggau Pekara Bebelika Barang) enggau Datuk Seri Nancy Shukri (Menteri Dagang Temuai, Seni enggau Main Asal).
Nangkanka nya, mangku pengawa Sapit Menteri iya nya Datuk Hanifah Hajar Taib nyadi Sapit Menteri ba Opis Menteri Besai (Pekara Sabah enggau Sarawak); Datuk Henry Sum Agong (Sapit Menteri Perengka Pengangkut); Datuk Aaron Ago Dagang (Sapit Menteri Pengerai); Datuk Hasbi Habibollah (Sapit Menteri Pemansang Menua Pesisir); Datuk Ali Biju (Sapit Menteri Bekal Kuasa Enggau Pengeraja Asal) enggau Datuk Willie Monggin (Sapit Menteri Dagang, Ladang enggau Komoditi).
Khairy Jamaluddin, Dr Adham Baba Betukar Portfolio
KUCHING, 27 Ogos; Khairy Jamaluddin betukar portfolio enggau Datuk Seri Dr Adham Baba nyadi menteri kabinet.
Khairy Jamaluddin dulu ari tu megai pangku pengawa nyadi Menteri Sains, Teknologi Enggau Inovasyen (MOSTI) tang diatu udah nyadi Menteri Pengerai.
Ke diatu, pangku pengawa Menteri Sains, Teknologi Enggau Inovasyen nya dipegai Datuk Seri Dr Adham Baba.
Portfolio kedua-dua menteri kabinet nya betukar ba baruh pegai menteri besai ke baru, Datuk Seri Ismail Sabri Yaakob.
Sebedau tu, Khairy enggau Adham Baba endang suah dipeda begulai ba aum media Badan Bertindak Imunisasi Covid-19 (CITF) ninting minggu ti bekerejasama rat dalam Program Betuchuk Vaksin covid-19 Menua (PICK).
Sida entara 31 iku dalam rintai menteri kabinet nyengkaum sida ke baru dalam kabinet iya nya Sapit Presiden Bersatu, Datuk Seri Ahmad Faizal Azumu ti dichiri nyadi Menteri Nembiak, Lumba enggau Main sereta Mandal Presiden PAS, Idris Ahmad ti megai pangku pengawa menteri ba Opis Menteri Besai (Pekara Jalai Pengarap).
Semua rintai menteri ke baru tu deka angkat sumpah ba mua Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah kena Hari Satu di Istana Negara.
