Kes baru COVID-19 menua sehari tu bisi penambah iya nya penyampau 21,176 kes enti dibanding 19,307 kes kemari.
Tuai direktor pengerai Tan Sri Dr Noor Hisham Abdullah nengah laman Twitter enggau Facebook iya madahka, penambah kes baru nya di serata menua ngujungka penyampau semua kes COVID-19 diatu manggai 1,940,950 kes.
Sarawak mengkang ngerikodka kes ninting ari pemadu tinggi iya nya 3,734 ditangkanka Selangor 3,595 kes enggau Johor 2,297 kes.
Nangkanka nya, Sabah mega ngerikodka penyampau (2,246) Pulau Pinang (1,939) Kedah (1,808) Perak (1,366) Kelantan (1,254) enggau Pahang (853).
Kes ba baruh angka 1,000 iya nya Terengganu (776) Melaka (485), Kuala Lumpur (467) Negeri Sembilan (252) Perlis (77) Putrajaya (21) enggau Labuan (6).
Dr. Noor Hisham mega madahka taka nguna katil Unit Sakit Raya (ICU) ba sepital COVID-19 di serata menua bisi 82 peratus tauka 1,590 lalu taka nguna katil ukai ICU iya nya 77 peratus tauka 17,493.
